Eusko Ikaskuntzak sinposio bat antolatu du eguenean, irailaren 10ean, Bilbon, 'Sinesmen-dibertsitatea eta komunitatearen ehuntzea' proiektuaren baitan. Jon Mentxakatorre proiektuko zuzendariak azaldu duenez, jardunaldiaren helburua gure gizartean gertatzen ari diren eraldaketak ulertzea eta tradizio, sinesmen eta bizipen desberdinen arteko elkarrizketaren bidez elkarbizitza indartzea da.
Azken mendeetan, Euskal Herrian panorama erlijioso eta espiritualean izandako eraldaketa sakona izan da. Sekularizazio prozesuak eta erlijio-aniztasunak egungo pertsona eta komunitate sinestunen egoerari buruz hausnartzera garamatzate, gizartean erlijioak, espiritualtasunak eta barneko bizitzak duten lekua, esanahia eta ekarpena argitzeko, eta elkarrizketa osasuntsu eta aberasgarriak sustatzeko.
Sinposiorako, Eusko Ikaskuntzak lau hitzaldi antolatu ditu. Aitor Sorreluz filosofoak eta Arantzazu aldizkariko zuzendariak 'Arantzazuk badu esangura' hitzaldia eskainiko du. Iosu Etxezarraga-ren eskutik, 'Konfesionalizazioa Euskal Herrian: herri, erakunde eta gizarte harremanen sustrai kristauak Goi Erdi Arotik aurrera' entzun ahalko da. Horrez gain, Mikel Artola filologo eta bertsolaritzaren didaktikan adituak 'Gaia, laia, jaia' aurkeztuko du. Azkenik, Marisabel Albizu-k, Ellacuria Fundaziotik, 'Ba ote dago erlijioen arteko elkarrizketarako oinarririk?' galderari erantzungo dio.
Jardunaldia Bilboko La Bolsa eraikinean hasiko da goizeko 10:00etan. Aretoa beteta egongo dela aurreikusten da, baina parte hartu nahi izanez gero, info@eusko-ikaskuntza.eus helbidera idatzita eskaera egin daiteke; plazaren bat geratzen bada, antolatzaileekin harremanetan jarriko dira.
