Zabaliburu jaialdiaren antolatzaileek Elena Odriozola ilustratzaileari emango diote aurtengo sari nagusia. Aitortza honekin, Donostiako artistaren nazioarteko ibilbide luzea eta arrakastatsua nabarmendu nahi dute. Saria bera ere artelan berezi bat izango da, Leire Garcia-Fanguito zeramikariak, Blas Arratibel artisautza lehiaketako irabazleak, jaialdirako berariaz sortutako eskultura bat.

Jaialdiaren bosgarren edizioa apirilaren 13tik 23ra bitartean egingo da Zabalganean, “Irakurmindu zaitez” lelopean. Odriozola saritzeaz gain, programazio osoak “liburuekiko maitasuna” izango du ardatz, irakurzaletasuna sustatzeko eta hiriko zein kanpoko sortzaileak auzora hurbiltzeko helburuarekin. Sonia Diaz de Corcuera Kultura zinegotziak azpimarratu duenez, ekimen honek funtsezko papera betetzen du liburuaren sektoreari laguntzeko eta kultur partaidetza indartzeko.

Zinegotziak auzoaren inplikazioa goraipatu du programazioaren antolaketan. Ikastetxeek, institutuak eta Zabaliburu kolektiboak elkarlanean aritu dira irakurketa maratoiak, olerki-xuxurlatzaileak eta erakusketak antolatzeko. Gainera, Karmele Jaio idazleak eta Helena Azkarraugarizar artistak ere parte hartuko dute; azken honek jaialdiaren irudia diseinatu eta ilustrazio tailer bat eskainiko du.

Jaialdiko ekitaldi nagusietako bat apirilaren 18an izango da, gizarte etxearen kanpoaldean egingo den liburu azokarekin. Goiz osoan zehar, bost liburu dendak eta hainbat argitaletxek beren produktuak erakutsiko dituzte. Lehen aldiz, autoargitalpenentzako tarte berezi bat ere egongo da azokan.