Gasteizko Kultura Zerbitzuak Virgen Blanca jaietako 2026ko kartel lehiaketaren oinarriak onartu ditu. Lehiaketa honetan parte hartu nahi duten artistek 3 eta 5 ilustrazio edo diseinu arteko dosier bat aurkeztu beharko dute, horietatik bi kartel izan beharko direlarik. Kartel horiek aurreko lanak edo simulazioak izan daitezke, betiere hiru urte baino gehiagoko antzinatasunik ez badute.

Hautagaitzak aurkezteko epea apirilaren 13an, astelehena, hasi eta apirilaren 24an amaituko da. Aurkezpenak Herritarren Arreta Bulegoetan egin ahal izango dira, baita egoitza elektronikoaren bidez ere, eta Administrazio Publikoen Administrazio Prozedura Erkidearen urriaren 1eko 39/2015 Legean aurreikusitako gainerako moduetan.

Maiatzaren 15ean, finalista gisa hautatutako bost dosierrak jakinaraziko dira. Hauek kartel proposamen bat egin eta ekainaren 1a baino lehen aurkeztu beharko dute. Horien artean aukeratuko da kartel irabazlea, eta erabakia egileari ekainaren 12an jakinaraziko zaio. Proposamen irabazleak 2.000 euroko saria jasoko du, eta finalista bakoitzak 500 euro.