Mikel Legarda EAJko Arabako diputatuak galdegin dio Ángel Victor Torres Lurralde Politika eta Memoria Demokratikoko ministroari ea posible den Trebiñu udalerriari buruzko galdeketa egitea, Euskal Autonomia Erkidegoaren barnean sartzeko duen nahiaren inguruan. Ministroak baiezkoa eman dio, baina azpimarratu du "legeak eskatzen dituen pauso guztiak" jarraitu behar direla.

Pauso horien artean, Burgoseko Diputazioa eta Gaztela eta Leongo Junta galdeketa egitearen alde azaldu beharko lirateke. Orain arte, bi erakunde horiek ezkor agertu dira gaiaren inguruan, eta Gaztela eta Leongo PSOEko goi kargu batek argi adierazi du "guztiz aurka" daudela. Ministroak gogorarazi duenez, udalerri bat Autonomia Erkidego batean sartzeko, beharrezkoa da beste batetik ateratzea, eta egoeraren "singulartasuna" eta "historikoki zehaztutako arrazoiak" ere aipatu ditu.

Legarda ez da erabat baikor azaldu Torresek emandako erantzunarekin, eta erabakia ahalik eta azkarren trebiñarrengan egon dadin eskatu dio. Trebiñuren inguruko eztabaida ez da berria; hainbatetan luzatu dira eskualdeko herritarrek eta alderdi politikoek eskakizunak, hala nola duela hilabete Hizkuntza Eskubideen Behatokiaren babesarekin Gaztela eta Leongo Gobernuari euskara ikasteko beharra helarazi izana.

Daniel de la Rosa, Gaztela eta Leongo PSOEko Antolakuntza idazkari eta Burgosko Gorte autonomikoetako prokuradoreak, berretsi du "Trebiñu Burgos dela eta hala izaten jarraituko duela". Azaldu duenez, ez da erabakirik hartuko Gaztela eta Leonen eta Burgosko probintziaren irizpidearen kontra, eta PSOEk beti probintziaren batasuna bermatuko duela gogorarazi du.