Sua 16:50 aldera hasi zen, Berantevillako Lacorzanilla industrialdeko Aernnova enpresaren instalazioetan. Zehazki, aeronautika sektoreko enpresa honen pintura-aretoari eragin zion, fabrikaren ondoan dagoen nabe batean kokatua eta erabat kiskalita geratu dena.
Sutearen ondorioz, lantegiko langile guztiak ebakuatu behar izan zituzten. Segurtasun Sailaren iturriek baieztatu dutenez, ez da kalte pertsonalik izan, nahiz eta kea instalazio guztietara zabaldu zen.
Espejo eta Iruña Okako suhiltzaileak berehala bertaratu ziren. Haiek lortu zuten sugarrak kontrolatzea eta itzaltzea arratsaldeko seirak baino lehen, nahiz eta oraindik ere bertan jarraitzen duten aireztapen lanak egiten.
Enpresako iturriek adierazi dutenez, momentuz ez dakite suteak eragindako kalte materialen zenbatekoa.
