Zerbitzu berritzaile honi esker, Gasteizko Udalaren hamar bat izapide bideo-deien bidez egin ahal izango dira, edozein lekutatik eta mugitu beharrik gabe. Horretarako, gailu mugikor bat (telefonoa edo tableta) edo kamera eta mikrofonoa dituen ordenagailu bat eta Interneterako konexioa beharko dira, udal arduradunek jakinarazi dutenez.
Bideo-arreta kanal berriak aurrez aurreko arretaren abantailak (zalantzak argitzeko berehalakotasuna, orientazio pertsonalizatua eta konfiantza) eta kanal digitalarenak (dokumentu digitalizatuak inprimatu gabe aurkezteko aukera eta edozein lekutatik kudeatzeko erosotasuna) uztartzen ditu. Nahiz eta herritar guztientzat irekita egon, bereziki baliagarria izango da mugikortasun urriko pertsonentzat, zaintzaileentzat edo hiritik kanpo daudenentzat.
Zerbitzu hau, euskaraz eta gaztelaniaz eskuragarri, Gasteizko Udalak herritarren arretan eskaintzen duen omnikanalitatearen hobekuntza bat da. Horrela, ohiko arreta-moduei (aurrez aurrekoa, telefonoz, autotramitazio makinen bidez, egoitza elektronikoan eta gorrentzako bideo-interpretazio zerbitzua) bideo-arreta gehitzen zaie.
Kanal horren bidez eskainiko den arreta egokitu ahal izateko, hasieran izapide batzuetarako gaitu dugu, baina harreraren arabera, kudeaketa berriak gehitzen joango dira.
Udal arduradunek bideo-arreta kanalaren konfidentzialtasuna eta segurtasuna bermatzen dituzte. Erabiltzeko, aldez aurretik hitzordua eskatu behar da telefonoz (010 edo 945 161 100) edo online. Ondoren, berrespen-mezu elektroniko bat jasoko da, hitzordura sartzeko estekarekin. Hitzorduaren egunean, estekan sartu eta identifikazio-agiri bat eskura izan beharko da nortasuna egiaztatzeko.
Hitzordu-eskaera aztertu ondoren, udal langileek izapidea egiteko beharrezko dokumentuak zehaztu ditzakete, eta horiek aurretik kargatu ahal izango dira plataformara, prozesua azkartzeko. Hitzorduaren egunean, grabatzeko baimena eman beharko da, eta grabazioa hiru hilabetez gordeko da. Sinadura behar duten izapideetarako, BakQ edo NAN elektronikoa bezalako ziurtagiri digital balioduna erabili ahal izango da. Izapidea amaitzean, herritarrak mezu elektroniko bat jasoko du egiaztagiriarekin eta aurkeztutako dokumentazioarekin. Hitzordu bakoitzeko izapide bakarra egingo da.
