Elena López Barredo Lan sailburuordea Gasteizen bildu zen asteazkenean enpresa batzordearekin. Batzordeak iragarri duenez, datorren astean beste bi bilera egingo dituzte: bata Tubos Reunidos-eko zuzendaritzarekin, eta bestea Industria Sailarekin eta Arabako Foru Aldundiarekin, apirilaren 16an.
Bilera hori Gasteizen egiten zen bitartean, ehun bat langile Lakuako eraikinaren kanpoaldean bildu ziren, egoeraren larritasuna azpimarratuz.
“"Lan gatazka nola konpondu argi dugu: enpresari EREa erretiratzeko eskatuz eta Amurrion altzairutegia eta logistika nola mantendu hitz eginez."
Oier Bidaurratzaga LABeko ordezkari sindikalak adierazi duenez, batzordeak argi utzi dio sailburuordeari gatazka konpontzeko hiru baldintza nagusi dituztela: EREa erretiratzea, eta Amurrioko altzairutegia eta logistika mantentzea. Baldintza horiek Bilbon enpresarekin egindako azken bileran ere errepikatu zituzten.
Langileen iritziz, erakundeek enpresari erantzukizunak eskatu beharrean, presioa langileengan, batzordean eta sindikatu jakin batzuengan jartzen ari dira. López Barredo k, bere aldetik, Lan Ikuskaritzaren txostenaren zorroztasuna bermatu du, eta akordio bat lortzeko bitartekaritza eskaini du, altzairutegiaren etorkizuna bermatzeko helburuarekin.
