Ekitaldi honek ikasleei beren etorkizun akademikoa eta profesionala erabakitzen laguntzea du helburu, prestakuntza-eskaintza zabala ezagutzeko aukera emanez. Goizez, 09:00etatik 13:30era, bisitak ikastetxeentzat gordeta egongo dira; arratsaldez, berriz, 16:00etatik 20:00etara, ikasleek beren familiekin joan ahal izango dute.
Hetel eta Ikaslan Araba erakundeetako profesionalek zalantzak argituko dituzte, hala nola sarbide-baldintzak, lanbide-irteerak, enplegagarritasun-aukerak eta ondorengo ibilbide akademikoak. Interesdunik kanpo gera ez dadin, urtero handitzen dira plaza kopuruak, eta oraindik izena eman ez dutenek www.avanza.eus webgunearen bidez egin dezakete.
Gurasoei zuzendutako hitzaldi bat egingo da berriro ere, aurreko edizioan izandako arrakasta ikusita.
Iazko edizioan lehen aldiz egin zen eta arrakasta handia izan zuen hitzaldiaren ondoren, aurten ere gurasoei zuzendutako saio bat antolatuko da. Hitzaldi hori apirilaren 21ean izango da, asteartea, 19:00etan, Europa Biltzar Jauregiko Gasteiz Aretoan. Sarrera doakoa da, baina aurrez izena eman behar da Avanza webgunearen bidez.
Acompañar sin presionar: claves para apoyar a nuestros hijos en la toma de decisiones izenburuko hitzaldia Silvia Ortiz hezkuntza-orientatzaileak emango du, zeinak 20 urte baino gehiagoko esperientzia baitu arlo horretan. Azken bost urteetan, Berritzegune Nagusian dihardu lanean, Bigarren Hezkuntzako orientatzaileen prestakuntzan eta laguntzan.
Ikaslan Araba eta Hetel sareetako zentroek antolatutako Avanza Lanbide Heziketako Azokak Eusko Jaurlaritzako Hezkuntza Saileko Lanbide Heziketako Sailburuordetzaren, Arabako Foru Aldundiaren eta Vital Fundazioaren laguntza du.
