Aste honetan hasi da Arabako Foru Aldundia lurralde osoko paper eta kartoia biltzeko edukiontziak ordezkatzen. Gaur egungo 1.080 edukiontziak, karga bertikalekoak eta kako bikoitzekoak, pixkanaka aldatuko dira bilketa automatizatua eta aldebikoa ahalbidetzen duen kako sistema duten beste batzuengatik.
Azpiegitura berriak Aiaraldean hasi dira jada martxan, eta gainerako edukiontziak pixkanaka ordezkatuko dira lurralde osoan. Saray Zárate Garapen Ekonomiko eta Jasangarritasuneko foru diputatuak azpimarratu duenez, kamioi berriak eta baliabide materialak gehitzeak “aurrerapen erabakigarria ekarriko du hondakinen kudeaketaren eraginkortasunean, bilketa arin, ordenatu eta iraunkorra erraztuz”.
“"Paper eta kartoiaren bilketa selektiborako azpiegitura berrietan inbertitzea funtsezkoa da zerbitzuaren kalitatea handitzeko eta hobetzeko, eta ekonomia zirkularreko eredu sendoago baterantz aurrera egiteko."
Záratek gaineratu duenez, “paper eta kartoia biltzeko sare ondo dimentsionatu eta hornitu batek materiala berreskuratzeko tasak nabarmen handitzen ditu eta desegokien presentzia murrizten du”. Bilketa zerbitzuaren kudeaketa 2025eko abuztutik Garbialdi enpresak egiten du, Daorje enpresak bi urtez eskaini zuen kontratuaren lagapen-eskritura formalizatu ondoren.
Zerbitzu honek, paper-kartoia biltzeaz eta kudeatzeaz gain, edukiontziak, mantentze-lanak eta konponketak barne hartzen ditu. Gainera, enpresak urtero bildu den paper-kartoiaren karakterizazioak egingo ditu, jarraipen-txostenak igorriko ditu eta edukiontzien eta ibilgailuen inbentarioa eguneratuko du, azken hauek lokalizazio-gailuekin hornituta egongo direlarik.
