Araba Euskaraz jaialdiaren aurtengo edizioa ekainaren 14an ospatuko da, eta horren harira, hainbat ekitaldi antolatzen ari dira giroa berotzeko. Horietako bat izan da gaur goizean Amurrioko Juan Urrutia parkeko GUK eskulturaren aurrean egindakoa, non Aresketa Ikastolak 2026ko ediziorako sortutako abestia, 'Taupadak berpiztu!', jendaurrean aurkeztu duen.
Aurkezpen ekitaldian, Aresketa Ikastolako ordezkariez gain, abestiaren egileak ere izan dira. Ikastolako ikasleek, berriz, koreografia berezi bat dantzatu dute, euskararen eta euskal kulturaren egoeraren aurrean "taupadak berpizteko" beharra azpimarratuz.
Euskararen biziberritzearen premia nabarmendu du abestiaren letrak, herriaren bihotz taupadak berpizteko deia eginez. Testuak 1960-1970eko berpizkundetik gaur egungo geldialdi zantzuei arteko ibilbidea gogora ekartzen du, eta euskara 'heriotzatik normalizaziotik baino gertuago' dagoela ohartarazten du, 'gogoa eta kuraia' aktibatzeko premia azpimarratuz.
Antolatzaileek azaldu dutenez, kantuak aniztasuna eta dantzagarritasuna ditu oinarri. Soinu organikoekin sortutako salsa doinu baten gainean, alboka, trikitixa, tronpeta, tronboia eta perkusio latinoaren nahasketa koloretsua entzun daiteke, entzuleak dantzara gonbidatuz.
Abestiaren sorkuntzaren atzean Aresketa Ikastolako kideak daude, eta hainbat musikari ezagunek ere hartu dute parte grabazioan. Ikastolako ikasleen ahotsak ere jaso ditu grabazioak, eta nahasketa eta masterizazio lanak estudio profesional batean egin dira.
