Aurkezpen ekitaldia Amurrioko Juan Urrutia parkeko GUK eskulturaren aurrean egin da. Bertan, Aresketa Ikastolako ordezkariek eta abestiaren sortzaileek parte hartu dute. Ikastolako ikasleek, berriz, abestirako berariaz prestatutako koreografia bat dantzatu dute, euskarak eta euskal kulturak bizi duten egoeraren aurrean “taupadak berpizteko” beharra azpimarratuz.

Taupadak berpiztu! abestiaren letrak euskara biziberritzeko dei zuzena egiten du, herriaren bihotzaren taupadak, joera kolektiboa, berriro ere martxan jartzeko. Abestiak euskararen egoerari buruzko gogoeta sakona egiten du, 1960-1970 hamarkadetako berpizkundetik abiatuta, egungo geldialdi zantzuak gainditzeko deia eginez. Euskara normaltasunetik baino heriotzatik gertuago dagoela ohartarazten du, eta “animoa eta kemena” berreskuratzeko gonbita egiten du.

Musika aldetik, soinu organikoen saltsa batetik abiatuta, hainbat herrialdetako doinuekin aberastu da (alboka, trikitia, tronpeta, tronboia eta perkusio latinoa). Abestiaren ekoizleek “zaporetsua” eta “salseroa” den emaitza lortu dute. Abestiaren egileek, Igon Olaguenaga eta Txiki Lora buru direla, hainbat musikari ezagunen laguntza izan dute, besteak beste, Amaia Santamaría (ahotsa), Rodrigo Ulises (perkusioa), Yago Salorio (baxua), Marcos Ortega (tronpeta), Fernando Blanca (tronboia), Ibon Koteron (alboka), Joseba Tapia (trikitia) eta Iñaki Otxondo “Moro” (letra eta ahotsa). Aresketa Ikastolako ikasle batzuen ahotsak ere jaso ditu abestiak, eta Elkar Estudioetako Víctor Sánchez izan da nahasketa eta masterizazio teknikaria.

Bideoklipari dagokionez, Eneko Martínez ikastolako ikasle ohiak, ikastola sortu zenetik lan egin duen komunitate osoari aitortza egin nahi izan dio, euskara aldeko taupadak etorkizunean ere bizirik iraun dezan festa bat ospatuz.