Arabako Foru Aldundiak lurraldeko udalei eta kuadrillei nahi gabeko bakardadeari aurre egiteko programak eta jarduerak garatzeko laguntzen lerro bat onetsi du. Gizarte Ongizaterako Foru Erakundearen bitartez, 100.000 euro banatuko ditu aurten, gero eta handiagoa den eta adin eta kolektibo guztietako pertsonei eragiten dien arazo honi aurre egiteko.
Foru erakundeak jakinarazi duenez, nahi gabeko bakardadea erroturik dagoen gertakari bat da, eta eragin zuzena du osasunean, ongizate emozionalean eta gizarte kohesioan. Toki inguruneetan eragin bereziki esanguratsua du, non biztanleriaren zahartzeak, despopulazioak edo baliabide komunitarioen sare mugatuak egoera larriagotu baitezakete.
Udalerri txiki eta ertainetan, despopulazioa, zahartze demografikoa eta baliabide komunitario mugatuak direla eta, egoera hau larriagotu egiten da. Ebidentzia teknikoaren arabera, nahi gabeko bakardadeak osasunerako beste arrisku faktore batzuen pareko ondorioak ditu, gaixotasun fisikoak eta osasun mentaleko arazoak areagotuz.
Testuinguru horretan, toki erakundeek, herritarrengandik gertu egonik, funtsezko zeregina betetzen dute bakardade egoerak detektatzeko eta udalerri bakoitzaren errealitatera egokitutako erantzunak abian jartzeko.
Horregatik, Gizarte Politiken Sailak 20.000 biztanletik beherako udalentzako eta kuadrillentzako laguntza deialdia egin du. Horrela, jarraipena ematen dio Araban nahi gabeko bakardadeari aurre egiteko 'Araba a Punto' lankidetza estrategiari, zeina Arabako Foru Aldundiak gidatu baitu azken urteotan.
Deialdi berriaren helburua da zaintza ekosistemak indartzea komunitatean, herri bakoitzaren gizarte, osasun eta hezkuntza zerbitzuak eta elkartesarea inplikatzen dituzten ekimenak sustatuz. Laguntzen bidez, bakardadea prebenitzeko, hautemateko eta esku hartzeko proiektuak finantzatu ahal izango dira. Jarduketak kolektibo desberdinei zuzendu ahal izango zaizkie, hala nola adinekoei, gazteei, haurrei, migratzaileei, desgaitasuna duten pertsonei edo zaurgarritasun egoeran daudenei.
Laguntzak norgehiagoka bidez emango dira, eta hainbat alderdi baloratuko dira, hala nola kalitate teknikoa, komunitatean duen eragina, berrikuntza, erakundeen arteko koordinazioa edo genero ikuspegia eta euskararen erabilera txertatzea.
Laguntza lerro berria abian jarrita, udalerriek esku hartzeko gaitasuna indartu ahal izango dute eta komunitatean, prebentzioan eta laguntzan oinarritutako arreta eredu bat finkatu. Deialdia irekita dago eta informazio guztia Arabako Lurralde Historikoaren Aldizkari Ofizialean (ALHAO) kontsulta daiteke.
