Mikel Jauregi Industria sailburuak adierazpenak egin ditu Guardian eta Glavista lantegien balizko berrirekierarako akordioari buruz, hedabideetan agertutako filtrazioen aurrean. Sailburuak zuhurtziaz jokatzeko deia egin du operazioa behar bezala ixteko, baina aldi berean datu berri garrantzitsuak plazaratu ditu.
“"Aiaraldeako Guardian eta Glavista lantegietarako bi inbertsore industrialekin adostasuna lortzear gaude. Nahiz eta diskrezioa eskatu dugun, filtrazioak izan dira. Berriro ere, zuhurtziaz jokatea eskatzen dugu operazio hau behar bezala ixteko."
Akordio honek Aiaraldean 400 lanpostu berri sortuko lituzkeela eta 80 eta 85 milioi euro arteko inbertsioa ekarriko lukeela azpimarratu du Jauregik. Horrela, eskualdeko industria instalazio handienetako bati etorkizuna bermatuko litzaioke. Sailburuak hilabeteak daramatzaten negoziazio konplexuak aipatu ditu, alderdi desberdinen arteko akordioak lortzeko.
Operazioa ixteko, elkarren artean baldintzatuta dauden zortzi aurreakordio sinatu behar direla azaldu du. Eusko Jaurlaritzari eta Arabako Foru Aldundiari dagozkion aurreakordioak jada sinatuta daude. Jauregik erantzukizuna eskatu die gainerako alde guztiei, beraien aurreakordioak ixteko, Aiaraldearen etorkizun industrialak merezi duelako.
Vocento taldeak filtratu du balizko akordioaren albistea apirilaren 7ko goizean, eta Aiaraldea Komunikabideak informazioa berretsi ahal izan du. Informazio horren arabera, VSF eta Gaviota konpainiak daude operazioaren atzean, Javier Garcia Marquez enpresariarekin batera.
