Vitoria-Gasteizko Ingurumen Ikasketen Zentroak (IIZ) ‘Mugitzen Gara’ programa berria aurkeztu du, hiriko hezkuntza-komunitatean mugikortasun jasangarria sustatzeko helburu argiarekin. Ekimen honetan 16 ikastetxek parte hartuko dute aktiboki.
Eskolara joateko mugikortasuna eguneroko bizitzako eremu garrantzitsua da, potentzial hezitzaile eta eraldatzaile handikoa. Hiriko milaka haurrek eta gaztek egunero egiten dituzten joan-etorriek espazio publikoaren erabilera, garraio-bideen aukeraketa, bide-segurtasuneko arriskuak eta komunitate-harremanak dakartzate beren baitan.
Eskolatik eremu hau lantzeak zuzenean lotzen ditu Garapen Jasangarriko Helburuekin, bereziki 3. helburua (‘Osasuna eta ongizatea’), 11. helburua (‘Hiri Jasangarriak’) eta 13. helburua (‘Ekintza klimaren alde’).
Vitoria-Gasteizko Udalak lehentasun nagusi gisa ditu trafiko motorizatua murriztea, oinezkoentzako eta bizikletentzako sareak zabaltzea, eskola-inguruneetan trafikoa baretzea eta espazio publikoa pertsonentzat berreskuratzea. Udaleko Ingurumeneko zinegotzi Borja Rodriguezek azpimarratu duenez, 'hezkuntza-zentroak funtsezko eragileak zarete helburu horiek lortzeko, zuen komunitateek milaka joan-etorri sortzen dituzuelako egunero eta ohiturak, eskaerak eta espazio publikoa hobetzeko proposamen zehatzak eragiteko gaitasuna duzuelako'.
‘Mugitzen Gara’ programari esker, IIZek eskola-komunitatearen mugikortasun aktiboa eta autonomoa sustatuko du. Horrela, ikastetxeek espazio publikoaren gobernantzan eta Vitoria-Gasteizko Mugikortasun Jasangarriaren Planaren garapenean parte hartzea bultzatuko da, ingurumen-trantsiziorako hezkuntza eraldatzailearen ikuspegitik.
Programak ikasleen autonomia sustatzea aurreikusten du, bereziki Lehen Hezkuntzan. Ikasleek mugikortasun aktiboarekin, bide-segurtasunarekin eta espazio publikoaren erabilera arduratsuarekin lotutako gaitasun, ezagutza, jarrera eta ohiturak landuko dituzte. Horrela, eskolara ibilgailu pribatuarekin joateko joera murriztuko da, oinez, bizikletaz, patinez eta garraio publikoaz joatea sustatuz.
‘Mugitzen Gara’ programa bi ikasturteko ziklo batean egituratzen da. Lehenengo ikasturte honetan, 2026-2027 ikasturtean, ikastetxearen inguruko eskola-mugikortasunaren eta espazio publikoaren errealitatea ezagutzea, datu sendoak sortzea, arazoak eta beharrak identifikatzea eta ikuspegi partekatua eraikitzea izango da helburu nagusia.
Borja Rodriguezek parte hartu duten ikastetxeei eskerrak eman nahi izan dizkie: Carmelitas Sagrado Corazón, Calasanz Escolapios, Urkide, Zabalgana, San Prudencio, Niño Jesús, Sagrado Corazón-Corazonistas, Paula Montal, Presentación de María, Inmaculada Concepción, Nuestra Señora de las Mercedes ikastetxeak eta Koldo Mitxelena, Francisco de Vitoria, Miguel de Unamuno eta Egibide institutuak.
