Bilbok azaroaren 20an hartuko du ITS Euskadi kongresua, mugikortasunari buruzko urteroko enpresa-topaketaren 17. edizioa. Euskadiko Mugikortasun eta Logistika Klusterrak antolatutako ekitaldiak enpresetako, unibertsitateetako, administrazioetako eta zentro teknologikoetako ordezkariak bilduko ditu.
Kongresuak aztertuko du berrikuntza eta teknologia berriak nola eraldatzen ari diren pertsonen eta salgaien mugikortasuna eta garraioa. Egitarauan 15 hitzaldi izango dira, mugikortasun adimendunarekin lotutako erronka, aukera eta joera nagusiei buruz.
Digitalizazioa, konektibitatea, adimen artifiziala, ibilgailu autonomoak, azpiegitura adimendunak, bide-segurtasuna eta eraginkortasuna nahiz kudeaketa hobetzea izango dira landuko diren gai nagusietako batzuk. Asimob, Basque CCAM, Bideroad, Euskaltel/Orange, Gertek, Indra, Kapsch, Kontron, Mobility Lab Vitoria-Gasteiz, Mondragon Unibertsitatea, Nemi, Sener, Tecnalia, Deustuko Unibertsitatea eta Klusterra erakunde eta enpresetako ordezkariek hartuko dute parte hizlari gisa.
Kongresua profesionalen arteko topagunea eta ezagutza nahiz esperientziak trukatzeko gunea izango da. Berrikuntzaren aplikazio praktikoetan eta mugikortasun seguruago, jasangarriago eta konektatuagorantz aurrera egiteko eskaintzen dituen aukeretan jarriko du arreta.
Ekitaldia Bilboko BAT B Accelerator Tower eraikinean egingo da, eta online ere jarraitu ahal izango da. Izena emateko epea zabalik dago Klusterraren webgunean, non programa osoa ere kontsulta daitekeen.
