Aurkezpena ostegunean, apirilaren 16an, arratsaldeko 19:00etan izango da, Donostiako alde zaharreko San Jeronimo kaleko Kripta aretoan. Ekitaldian, solasaldia egingo da Asier Basurto Arruti egilearekin, ARGIAk eta Bizilagunekin plataformak elkarrekin antolatuta.
Turismoa. Desazkundera bidaia saiakera liburuan, Basurtok egungo turismo ereduari buruzko analisi sakona egiten du, eta desazkunde turistikoaren aldeko gogoetak plazaratzen ditu. Liburuak, besteak beste, etxebizitzaren arazoan, ingurumenean, enpleguan eta identitate kulturalean turismoak dituen eragin negatiboak azpimarratzen ditu, bestelako eredu baterako urratsak ematearen beharra defendatuz.
“"Ihes egin behar da soilik saturatutako egunez eta saturatutako zonaldeez hitz egitetik; ikusi behar dugu gizarte egitura osoan zer ukitzen duen turismo-ereduak."
Liburuaren hirugarren atalean, Basurtok beste eredu baterako bide-orri bat proposatzen du, hiru zutabetan oinarrituta: lurraldeen turistifikazioari erresistentzia egitea, turismo sektorea eraldatzea tokiko ekonomian duen pisua jaitsiz eta lan baldintza duinak bermatuz, eta opor eredu jasangarriago bat kolektiboki asmatzea.
Asier Basurto Arruti, liburuaren egilea, Donostiako Bizilagunekin desazkunde turistikoaren aldeko herritar taldeko kide da duela hamar urtetik. Talde honek Donostiaren turistifikazio prozesuaren aurka eta bestelako hiri-eredu baten aldeko ekintzak sustatzen ditu, datuen analisia, eztabaida eta mobilizazioa erabiliz.
