Jaien hasiera ofiziala Maitane Perez Gomezen pregoiaren ondoren izango da, eta jarraian Aiara Dantza Taldeak euskal dantzen erakustaldia eskainiko du. Gauean, Elektrotxaranga eta Jonkass arituko dira. Jonkass, Akerbeltz erromeria taldeko abeslari ohia, bere proiektu berriarekin dator, erromeria eta berbena estiloari eutsiz. Lehenengo jai eguna DJ Blessivek itxiko du goizaldean.

Ondorengo egunetan, ohiko jarduerak izango dira, hala nola haurrentzako puzgarriak eta jolasak, kirol ekitaldiak eta kontzertuak. Apirilaren 25ean, larunbatean, Jesus Isasi Memoriala txirrindularitza lasterketa eta Euskal Jaia ospatuko dira, Barre bidean ikuskizun ibiltariarekin. Gauean, Gautegun erromeria eta DJ Sospechoso de Spam izango dira.

Apirilaren 26an, igandean, herri kirolak eta bola jokoa izango dira Kexaan, eta nagusientzako bazkaria eta dantzak Luiaondoko Oleta jatetxean. Astelehenean, apirilaren 27an, Las invisibles filma proiektatuko da. Jaiak apirilaren 28an, asteartean, amaituko dira eskualdeko azoka, Etxaurren Ikastolako haurren danborrada, Patxi Perezen dantza plaza eta odoloste janarekin.

Aiarako Udalak autobus zerbitzua eskainiko du ostiralean eta larunbatean, herritarrek jaietara eroso joan ahal izateko.