Iruneko Udaleko EAJ-PNVren Batzarrak komunikatu bat igorri du arratsaldean, bertako gobernu-bazkideari, PSE-EEri, "erabaki garrantzitsuak elkarlanean, errespetu instituzionalarekin eta parte hartze errealean eraiki daitezela" eskatuz.
Jeltzaleek idatzian adierazi dutenez, 2025ean akordioa lortu zenean Udaleko Gobernua osatzeko, "lan partekatuan, entzutean, desberdinen arteko errespetuan eta herritarrengana zabalago eta konektatuago dagoen gobernu-molde batean" oinarritutako etapa bat irekitzeko izan zen, ez "betiko dinamika berberak mantentzeko".
Hala ere, "gobernatzea ezin dela izan erabaki estrategikoak lehenik hedabideetara eta gero gobernuaren parte direnera helaraztea" adierazi dute modu argian.
Azken adibide gisa, joan den ostiralean Ficobako Pabellón IAM proiektu berria aurkezteko egin zen agerraldia aipatu dute, zeinaren berri jeltzaleek ez baitzuten inolako ezagutzarik agerraldia baino lehen. Azpimarratzekoa da alor horretan, Obra, Mantentze eta Azpiegituren Arloa EAJ-PNVren ardurapean dagoela. Gainera, "iragarpenak akordioaren aurretik jartzen dituzten jarduera-moldeek, titularrak lan partekatuaren aurretik eta komunikazio politikoa hiri-eraikuntza kolektiboaren aurretik" kezka sortzen dietela adierazi dute.
Komunikatuan bertan, diote "agintaldiaren hasieran Alkatetzan izandako erreleboak (Jose Antonio Santanoren irteera eta Cristina Labordaren sarrera aipatuz) aldaketarako itxaropenak sortu zituela, eta irundar askok oraindik ikusteko espero dituztela", hamarkadetan "gure hiriaren historiaren parte den lidergo politiko beraren pean gobernatzen" duen baina "berritzeko gaitasuna eta gauzak egiteko modu berriak eskatzen dituen" hiri batean.
Amaitzeko, jeltzaleek eskatzen dute "egoera bideratzea, Gobernu-bazkideak Irungo EAJ-PNV berriro kontuan har dezan, denon artean Irun hobe bat eraikitzeko".
Alderdi sozialistaren eta Iruneko EAJ-PNVren arteko akordioa duela urte eta erdi iragarri zen, 2025eko urtarrilaren 29an, helburu honekin: Cristina Laborda alkateak esan zuenez, "agintaldi honetatik haratago doazen proiektu estrategikoak" gauzatzea, besteak beste, Vía Irun, Hegoaldeko Saihesbidea eta aipatutako Pabellón IAM.
Arloen banaketan, PSEk Gobernu Irekia eta Herritarren Arreta; Ogasuna, Zerbitzu Orokorrak eta Hiriaren Bultzada (Bidasoa Activa – Partzuergoa); Kultura, Hezkuntza, Gazteria eta Kirolak; eta Hirigintza, Mugikortasuna eta Garapen Iraunkorra (Irunvi) hartu zituen. Jeltzaleek Segurtasunaren eta Herritarren Bizikidetzaren arloak; Gizarte Ongizatea eta Berdintasuna; Obrak, Mantentze eta Azpiegiturak; eta Euskara Delegaritzaren ardura hartu zuten.
